June 16, 2009

Dr. Richard Visser: Un Homber di Accion y di Solucion

Turismo ta nos entrada. Nos producto ta nos hospitalidad, nos hendenan, nos seguridad y nos beachnan. Mirando e rumbo cu nos pais Aruba ta bayendo, nos economia ta na peliger, loke ta nifica cu nos entrada ta na peliger.

Pa por saca Aruba for di e decadencia cu e ta aden y pone riba un rumbo nobo, mester di liderasco cu e vision di Juancho Irausquin, e determinacion di Betico Croes y e disciplina di un atleta hoben. Ta pesey nos mester di AVP, vision, determinacion y disciplina. Dr. Richad Visser no ta un homber di palabra sino di accion. Despues di su retiro for di Parlamento, Dr. Richard Visser no a stop di sigui traha na bienestar di nos pais Aruba. Entre Mei y October 2008 Dr. Richard Visser a termina e Plan Nacional Aruba , pa e lucha contra Sobrepeso, Obesidad y Asuntonan relaciona cu Salubridad, pa gobierno di Aruba.Ademas, na 2008, e tabata na Bruselas, Belgica, cerca e Alianza di Salubrdad Publico Europeo pa e aprobacion pa e Plan Nacional Aruba 2009 – 2018. “Mi pasion, mi vision, mi determinacion y mi disciplina ta loke ta ponemi entrega mi mes completamente pa asina trata e asunto di Salubrdad Publico den un sentido mas amplio,”  esaki tabata e palabranan di un persona cu ta determina pa yuda su Pais Aruba.

Mirando su determinacion y dedicacion Dr. Richard Visser no solamente a wordo invita pa duna lectura pa Valero y FTA sino tambe na e Conferencia di Bryson na 2008 y 2009. Unda cu Dr. Richard Visser a presenta, e tabata wordo mira como un homber di iniciativa y accion. Di 2000 pa 2005 Dr. Richard Visser tabata director medico di e Comite Olimpico di Aruba mientras cu entre 2003 y 2006 e tabata Director di un programa di investigacion di Obesidad cerca tur mucha entre 6 y 11 anja. Ademas, na anja 2007, e tabata na Boneiro pa ta hunto cu professor R.A.Hirasing di VU Medisch Centrum Amsterdam haci un studio di obesidad cerca muchanan di scolnan basico comparando Boneiro cu Aruba. Mientras cu a Januari 2008 e tabata e “experto” (miembro di e commision) di e Obesity Task Force pa Aruba.

Recientemente dr. Richard Visser a traha riba un proyecto di “foodlabeling” y investigacion pa Aruba hunto cu VUMC Amsterdam. E proyecto aki lo yuda e consumidor pa trece cambio den su custumber den haci compras y cu e conocemento aki cumpra cumindanan cu ta mas saludabel. Ademirabel pa bisa cu tin organisacionan cu ta dispuesto pa pone e fondonan necesario di inmediato pa asina cuminsa na ehecuta e proyecto aki.

No solamente Dr. Richard Visser a haci tur tipo di estudio pa loke ta trata obesidad, sino el a traha riba e tereno di salud den tur sentido di palabra. Dr. Richard Visser ta fundador y director di CPR Youth Foundation Aruba, cu a wordo estableci na 1995.Tambe e ta co-propietario di Rescatami, fundador di “How We Give” Rehabilitaion Facility; Presidente di Fellowship Foundation Recovery Facility and Half Way House y asina nos por sigui menciona.

Dr Visser ta sigur ta kere cu “Nos mester inverti den nos hendenan, nos talentonan local, nos inteligencia local. Nos mester sostene y aprecia nos mes.” Un di e pogramanan cu cual Dr. Richard Visser a causa impacto aki na Aruba tabata e “Xtreme H Games”. Un programa pa hobennan entre edad di 6 pa 17 anja, cu el a plania, desaroya y a ehecuta durante tres anja y cu ta wordo tene 10 biaha pa anja. Durante e programa aki nos hobennan ta trata topiconan manera salud, nutricion y movecion y tambe nan ta participa na tayernan cu ta sinja nan cosnan nobo pa asina nan por mehora nan mes.

Tur e hechonan ariba menciona ta demostra cu Dr. Richard Visser ta e persona adecua pa trece e cambio. Poniendo bo confiansa den Dr. Richard Visser bo ta dune e oportunidad pa drenta den accion.E accion cu tanto nos tur ta wardando ariba dje. E accion pa hasi e cambio real pa nos Aruba pasobra mi salud y mi futuro lo ta den su man.“Nos mester lanta y para firme pa asina nos proteha nos parti mas vulnerabel cu ta nos yiunan, nos mamanan soltero y nos grandinan. Nos mester para fuerte y promove nos parti mas vital, cual ta nos comercio – chikito y grandi. Nos mester lucha pa husticia y disciplina, inverti den Salud y Educacion pa asina nos obreronan, cu ta e motor tras di nos economia, por bai dilanti.”

Den nos tur tin un heroe. Y esaki ta e momento pa lanta para y uni forsa pa asina hunto cu Dr. Richard Visser y AVP nos drenta den accion y traha Pa Un Miho Aruba.